// Internet Heute

Dienstag, Januar 08, 2008

// Fastelovend - oder - Fasteleer

D'r Fastelovend (ou Fasteleer of Karneval) is et Pläsiersche vun jedem dä nit doof eßß. Häßß do ävver en Ratsch am Kappes, dann sääß do natöörlijj dat dä Aschamettwoch et jrößte eßß. Dat stemp äwwer net. Saare de Fastelovendßjecke.

Traditioon
Wie dä Mann zom Wiev jehoot, esu is et och mem Fastelovend unn dem Rhingland. Un dä Rosenmaandachszoch esuwieesu. Äwwa wieso eijentlesch? Nunneja, im 30-järrijje-kriej do es et esu jewisse: Mir Rhingländer mosste wider willen och kempfe. Ävver mir hatten unlust! dann hamme mer ejnfach beukottiert: Mir schossen mit Kamelle, worfe Strüßje un spillten lustijje moseek. Esu erjoov sich dat.

Äöffnung
Am Ellefte im Ellefte öm Ellev_Uur Ellef weet de Sessjoon äöffnet. En Kölle jäijt dat tradizzjoonäll ö_m Alldermaat aff. Nuur wänn_et doo nit jaijt, wann jraad en Bowshtäll eßß, dann wiishe_mer tradizjonäll op dä Heumaat uß. Do kumme dann emmer e paa zeen dousend Minsche zosamme un senge un schunkele, drenke sijj_eijn, danze un maachen sijj_en Freud. Wenn_t Wädder schöön eß, dann jäijt dat bess_en_de Naach.

In Berlin jangk ma noh dä StäV, datt eßß wuh de Rhingländer sisch treffe.

Sitzunge
Av däm Ellefte im Ellefte jitt en jedem Dörfje rund öm Kölle en eijen Sitzung. Doh jitt ed Prunksitzunge, Kostümsitzunge, Herrensitzunge, Kindersitzunge un Fernsehsitzunge. Sujaa en Shtungksėtzung jidd_edd_en Kölle. Ene Jeck där jett op sich hält besöck mindestens eeijn Sitzung en de Session. Miistens äver mieh dovun. Bei en Sitzung jehüüren jewisse Sache dobei wie ed Salz en de Supp.

Eleeferoot
De Eleeferoot repräsenteert dä Karnevalsverein där die Sitzung veranstallte deiit. Der Kopp vum Eleeferoot ees de Präsident. Der kennt dat Projramm vun dä Sitzung un deiit die einzelne Projrammpunkte aahnsache.


Tanzkorps
Eene Projrammpunk en_ener Sitzung ees eh Tanzkorps. Eh Tanzkorps stellt emmer en Abteilung vum Militär dar öm su an de Aanfang vom Fastelovend zo erinnere. De Jalleonsfejur vun enem Tanzkorps ees et Mariesche. Die Firjur erinnert an de Marketenderinne, die de Zoldate domols versorch han.

Bütteredd
En Bütteredd ees ene witzije Wortfürdraach. Miistens stellt där Künsler en bestimmte Tüppe dar. Em Fürdraach witt alles möchlije durch de Kakau jetrocke. Am leevste de Politiker äver och Lück wie Du un Isch. Wenn zwei Künsler op de Bühn stonn nennt meh dat eh Zwiijespräch. Die ungerhallen sich dann eh bischje. Miistens speelt eeijner dovon ene Doof un dä andere ene normale Minsch.

Dä (Abzt) kütt sujaar us ejner Kannewallisstenfammillisch! (Münchrath un Münchrath)!

Dreijesteern
Die eijentlische Rejent en de Session ees et Dreijesteern. Et besteeht us däm Prinz, dem Buur un dä Jungfrou. En kleener Dörfje jitt ed och Prinzenpaare oder eenfach nur ene Prinz. En ener Sitzung ees dä Auftritt vum Dreijesteern dä Hühepunk. Dä Prinz begröss dann sing närrisches Vulek un deit se dran erinnere dat se veel Spass han sulle un nitt emmer alles su eerns nemme sulle.

Wieverfastelovend
An Wieverfastelovend fänk em Rhingland de Strooßekarneval aan. Me triff sich dann en de Kneipe un op de Strooß. All Jecke sin verkleed un jott dropp. De Uursprung vun Wieverfastelovend kütt uss Bonn. Un zwar han 1824 die Wäschwiever uss Beuel sich zesammejeschlosse un han eh Damenkomitee jejründt öm selever och Fastelovend ze fiere. Dat wor bees dohin nur för de Männer jedaach jewess. Seit däm hätt sich de Wieverfastelovend em janze Rhingland verbreitet. En Beuel trick dann och ene jruusse Fastelovendzooch doorch de Strooße. En Beuel jitt ed och keeijne Prinz sundern en Wäscheprinzessin öm an de Ursprung vun Wieverfastelovend ze erinnere. En andere Dörfje werden op Wieverfstelovend Sitzunge avjehalde. Die suhjenannte Möönesitzunge oder Mädchesitzunge sin verjleischbar met de Herrensitzunge, weil do dann nur Froulück erinn dürfen.

Ruusemoondaachszoch
Dä Ruusemoondaach me_m Ruusemoondaachszoch ees dä hüühtzte Fierdaach en de fünefte Joohreszick. En Kölle un veele andere Jemeinde zweesche Mainz un Düsseldorf trick ene lange Zooch met bunt jeschmöckte Waache un verkleedete Fooßjruppe doorch de Strooße un schmieße Kamelle un Strüüßje. Ed jitt äver och Dörfje un Shtädt die ad an Fastelovendsunndach odder iirz Fastelovendsdinnsdaach loosträcke. Nohm Zooch witt dan jefiiert bes spät en de Naach. En Lėßß met de Termine vun de Fastelovendzöch fingkste hee.


Alternativkaaneval
Ett jitt vill Lück di saare, nää isch sinn doh nit jeck, isch will ming Pläsiir hann äwwer dä janze Drißß med Tatatataah unn Bütt dat will isch nid. Da jittet dann de haade Junx wi dä Wolfgang Niedecken vunn BAP dä dat övverhoup ned will (dä jangk do ned föör Kooche hin). Unn dann jitt_et de Lück di wolle Fastelovend äwer ned esuh. Däswäjje hätt sisch dann en Alternativkaaneval entwickelt, met Strunx, Prinzessin Au hur unn Jeijsterzoch. Äwwer hück eßß dat jenouso wi dä nomaale Fastelovvend.

Websigge
* Koelner Karneval Info (op deutsch)
* Karneval in St.Vith (övverwiijend_op deutsch)
* Karneval in Ostbelgien (op deutsch)

Alaaf!!!
(rofen de Gecke am Karneval vun Oche öwer Kölle, Bonn, Siebursch beß hinger Much.)

Links to this post:

Link erstellen

http://www.blogger.com/template-edit.g?blogID=32756251

<< Home

 

Blogverzeichnis - Blog Verzeichnis bloggerei.de